Onjel

Onjel iku jeneng kancaku SMP. Jeneng asline Yulianto. Omahe ana ing Banjarharjo, Pondokrejo, Tempel, Sleman, cerak karo omahe kancaku sak kelas liyane, yaiku Nasip Mulyanto. Onjel iku bocahe ireng, polahe lucu ngguyokake, atine apik. Seneng kekancan karo bocahe.

Jaman SMP biyen aku kerep dolan neng omahe Onjel. Biyasane bareng karo Nasip merga omahe Onjel karo Nasip sing cedhak. Sok-sok, Triono sing beda kelas nanging omahe cedhak karo omahku ya melu dolan awit neng sekitar Pondokreja ya akeh kanca sak kelase Triyono. Aku seneng dolan neng omahe Onjel sebab wong tuwane Onjel ya nyenengake. Kanca-kancane Onjel sing dha dolan ditrima kanthi apik kaya anak-anake dhewe.

Aku isih kelingan jaman semana pit-pitan karo Nasip lan Onjel tekan Ancol Bligo. Mbuh Triono melu apa ora aku ora kelingan.

Ancol Bligo iku panggonan pedolanan ing pinggir Kali Progo ing tlatah Bligo, Ngluwar, Magelang. Ing kana akeh nom-noman lanang wedok dha dolan. Ana sing delok kali saka ndhuwur, ana sing medhun neng kali, ana sing dha pacaran. Aku dolan tekan Bligo pisanan ya bareng Onjel karo Nasip. Aku jan durung ngerti panggonan iku merga aku pancen ora nate dolan adoh. Jaman SMP biyen, aku kudu neng omah menawa almarhum Bapak kondur saka ngasta. Mula aku ora bisa dolan adoh-adoh.

Aja Udud Akeh-Akeh

Aku lali crita iki kedadeyan jaman aku kelas telu SMP utawa kelas siji SMA. Ketoke sing paling nyeraki kahanane kuwi pas aku wis kelas siji SMA awit aku wus duwe dhuwit dhewe pas kelas siji SMA.

Kawit SD kelas lima aku wis ajar udud. Udude dhelik-dhelikan. Umpama ora duwe dhuwit kanggo tuku salencer udud, aku saba kebon golek wit uwi sing wis garing kanggo ganti udud. Jaman kelas telu SMP umpama dolan pit-pitan karo para kanca mesthi sangu udud. Udude dituku urunan. Mula, jaman mlebu SMA, aku rumangsa udud ya ora papa wong aku tuku udud ora nganggo dhuwit saka wong tuwa.

Pas prehi sekolah aku bali nang ngomah. SMAku salah sawijine sekolah asrama dadi aku bisa bali ana ing wayah prehi. Nah, pas prehi kuwi aku udud nang ngomah. Bapak (almarhum) sing ora nate ses menangi aku gek klempas-klempus udud nang ngomah.

Ratna Meteng

Kedaden iki wis suwe banget. Jaman aku isih kelas siji SMA, udakara tahun 1990. Wektu iku aku karo kancaku SMP kang jenenge Triono agi lungguhan nang prapatan Medari neng sandhinge warung sayuran Bu Atemo. Jaman semana prapatan Medari ing pinggir dalam Yogya – Magelang ora kaya sakiki. Biyen isih ana warung sayuran Bu Atemo ing sisih kulon prapatan sing panggonane ing pinggir rel sepur neng ngisor cagak listrik. Papan pesthine antarane Kantor Pos dan Giro Medari karo dalan Yogya – Magelang.

Aku lan Triono lungguhan nang ngarepe kios duweke bapake Suroto. Mulih sekolah ngobrol ngalor ngidul ora karuhan. Apa wae diobrolke nganti tekan babagan Ratna meteng. Ratna sing dimaksud kuwi Ratna Klumprit. Daksebut wae Ratna Klumprit awit kenya ayu saka kelas IIIB iku pancen omahe Klumprit. Ing obrolan ngisor iki, Kombor ditengeri [?] lan Triono ditengeri [&].

Ontran-Ontran Pajeksan Agung

Ontran-ontran Pajeksan Agung mesthine wus bisa dilereni sakuwise Mahkamah Konstitusi mutuske perkara kang diajokake dening Profesor Yusril Ihza Mahendra. Ing dina Rebo 22-9-2010, Mahkamah Konstitusi ngabulake separon gugatane Profesor Yusril menangi dawane palungguhan Jaksa Agung. Mahkamah Konstitusi mutuske menawa palungguhan Jaksa Agung rampung bareng karo lerene Presiden ing mangsa pamarentahane bareng karo anggota kabinet liyane ing mangsa kang kasebut utawa palungguhan Jaksa Agung rampung umpama dilerenake dening Presiden ing mangsa kang kasebut.

Tinggal Glanggang Colong Playu

Aku wong kang kuwasa ngatur artaning negara. Apa bae kang bakal dadi blanjane negara, aku sing wenang nyarujuki utawa ora nyarujuki. Akeh utawa sithik ora dadi perkara menawa aku wis nibakake ukara sarujuk. Sakwalike, sithik bakal dadi perkara manawa aku rumangsa dhuwit iku ora prenah ing tata.
Aku paling pinter babagan dhedhuwitane negara. Jaman para prajurit butuh gegaman anyar, aku ora sarujuk. Iki jaman susah, gaman anyar ora kudu dituku. Mula aja padha kaget menawa para prajurit kita sakiki sregep ndedonga awit sing bisa paring slamet ya mung Gusti kang Maha Kuwasa. Arep nggegadhang bedhile ora bisa merga bedhile kerep mejen. Arep nggegadhang monto mabure ora bisa merga montor mabur akeh sing ora bisa mabur. Arep nggegadhang prahu perang ora bisa awit prahu perang ora ana gamane. Wis, jarno wae. Sing penting dhuwit negara aman.

Kurang 3,87 Dolar

Sakliyane kanggo golek warta, kaweruhan utawa ngeblog, aku uga wis rada suwe melu manpangatake internet kanggo golek dhuwit. Sarana kanggo golek dhuwit saka internet sing dakeloni pisanan yaiku Google Adsense.
Sakdurunge donya nemoni krisis ekonomi sakjagad tahun 2008, saben rong sasi aku isa nampa cek saka Google Adsense. Nanging, sakuwise ana krisis ekonomi, pametu saka Google Adsense mudhun nganti tekan ing dhasaran. Aja maneh bayaran saben rong sasi, golek sesasi 20 dolar wae aku angel. Yen daketung-etung, nganti 6 sasi aku nembe entuk bayaran saka Google Adsense sing dikirim liwat Western Union. Bayaran sing keri dhewe iku daktukokake omah-omahan anak-anakan (boneka) barbie sebab dhenok kepingin omah-omahan barbie kaya duweke kancane. Bayaran keri dhewe iku daktampa wulan siji. Sakiki wulan kaping papat lan aku durung nampa bayar maneh.

Ora Kudu Bali Sleman Kanggo Ngicipi Wedang Ronde

Kanggone wong asli Sleman kaya aku, wedang ronde dudu barang aneh. Wedang kang digawe saka jahe ditambahi kacang, roti tawar, kolang-kaling lan jenang glepung iku mirasani umpama diunjuk ing wayah wengi pas hawa krasa atis. Iline wedang ronde seka tutuk mudhun liwat gulu tekan dhadha terus nang weteng krasa ngangetake. Pedhes, legi, anget campur dadi siji gawe segere awak.

Wedang kaya mangkono, ing tlatah Tangerang kene bisa dipadhakake karo sekoteng. Dhek jaman kuliah, aku ya kerep tuku sekoteng menawa ana bakul sekoteng sing liwat ngarep kontrakan. Sakiki aku ora nate tuku sekoteng maneh. Ora usah tuku sekoteng kanggo gawe angete awak awit ing Citra Raya Tangerang sakiki wis ana warung wedang ronde. Bakule ora liya Pak Wandono kang manggon ing Graha Sevilla, Citra Raya Tangerang.

Wedang ronde Pak Wandono rasane manteb. Pedhese lan legine pas. Jahe dibakar dhisik sakdurunge digodhog digawe wedang. Wis ta, para kadang boro ing tlatah Tangerang ora susah bali ing njawa menawa arep ngunjuk wedang ronde. Cukup dolan ing Citra Raya Tangerang lan goleki wae warung wedang ronde Pak Wandono kang dibukak saben Senin tekan Setu bengi ing ngarep Taman Picasso, Citra Raya Tangerang.

Panjenengan mesthi ilang kangene karo wedang asli Jawa Tengah iku. Wis, monggo dipadosi.

Nginep Nang Hotel Avanza

Aku yakin menawa Sampeyan durung tahu nginep nang Hotel Avanza. Mbokmanawa ana sing uwis tahu ning dak kira langka anane.
Hotel Avanza. Sakjane dudu hotel ning mobil Toyota Avanza. Dak arani Hotel Avanza awit aku lan kulawargaku nate turu neng sakjerone Avanza ana ing tlatah Limbangan, Garut, nalika arep bali saka Sleman menyang Tangerang ngliwati Bandung.

Avanza sing daksupiri mbledhos selang radiatore merga kepanasen. Le mbledhos kaping pindho. Mbledhos sepisanan sakdurunge Limbangan pas ana ing unggah-unggahan kang rada dhuwur. Kahanan rada macet. Aku wis rada kuwatir menangi dom ukuran panas nandhakake yen mesin panas banget. Nanging wektu iku mobil pas neng unggah-unggagan. Aku nyoba supaya mobil isa ngliwati unggah-unggahan lan leren sakuwise dalan miringe mudhun. Nanging, kurang sethitik saka pucuke unggah-unggahan krungu swara mbledhos lan dumadakan mobil ora ana tenagane. Gage rem tangan dak tarik nuli kap dak bukak. Langit wis peteng merga maghrib wis tekan. Aku ora weruh selang ucul.